Page 2 - Korrels Winter uitgawe 3-2025

Maar dit eindig nie daar nie. Ons leef nie net vir Christus nie, ons
doen dit met hoop. Hierdie hoop is nie ’n valse optimisme of
“positiewe denke” nie. Dit is ’n vaste anker vir die siel (Hebreërs
6:19). Dist is die wete dat Christus die oorwinning reeds behaal het,
dat die Heilige Gees nou in ons woon, en dat daar ’n toekoms is wat
nie van ons omstandighede afhang nie. Selfs in pyn, verlies, twyfel of
onsekerheid, dra hierdie hoop ons en herinner dit ons daaraan dat
ons nie alleen is nie, en ook nie doelloos nie.

Om vir Christus te leef met hoop beteken dus dat jy jou lig laat skyn
in donker tye. Jy kies om liefdevol te wees waar ander koud is, om

reg te doen waar ander onreg kies en om met vrede te leef selfs
wanneer alles in jou lewe stormagtig voel. Hoop verander nie net hoe

ons na die toekoms kyk nie - dit verander hoe ons die hede leef.
Mag hierdie kwartaal se tema jou inspireer en versterk om in
Christus se voetspore te volg, om jou hart aan Hom toe te vertrou, en
om met vreugde en verwagting vorentoe te kyk. Jy is nie alleen op
hierdie pad nie. Jesus stap saam met jou en Hy is die bron van jou
hoop.

Leef vir Hom.
Leef met hoop.
En weet: Hy maak alle dinge nuut.
Ds Jeandré Slabbert

Lied / Psalm 33:7

2