Page 15 - Korrels 4-2024 Lente uitgawe

Na die afloop van die diens het ons ‘n Bybelse ete saam geniet. By
die ete het ons mekaar ook geleentheid gegee om ‘n vingerafdruk te
maak op ‘n skets van ‘n boom. Die vyeboom was vir die laaste paar
jaar vir ons gemeente ‘n belangrike simbool. Ons weet dat ons soos
‘n boom geplant is by strome van Lewende Water en dat God ons
voed en vir ons voorsien. Daarom wil ons graag met ons vingeraf-
drukke onsself ook opnuut hertoewy as dissipels van ons Here.
Ons wil graag ons dank uitspreek teenoor Dr Mike Heaney wat vir
ons almal ‘n ware voorbeeld van dissipelskap is. Dr Mike was vir by-
kans 18 jaar werksaam in NG Margate en hy sal sy demissie ontvang
op 1 September 2024. Dr Mike was vir die gemeente, sy kollega en
die gemeenskap ‘n voorbeeld van opregte diensbaarheid. Dr Mike sal
gemis word, nie net in die gemeente nie, maar ook op Rings- en Si-
nodale vlak, waar hy met baie kundigheid gedien het. Ons gaan veral
sy gawe ten opsigte van ekumene mis. Ons bid vir Dr Mike en vir
Jennie die Here se seën toe op hulle pad. Ons dank Jennie ook vir
haar diensbaarheid en die rol wat sy gespeel het op die terrein van
die Vrouediens, Jeug en die sanggroep.
Ons is baie dankbaar teenoor die Here vir die afgelope tyd. Ons
kyk ook met oë vol hoop vorentoe, omdat ons weet dat ons kan vol-
hard in die wedloop, want God gee ons moed. Ons bid God se seën
toe oor ons gemeente en gemeentelede. Ons vra dat God ons hande,
voete en hele wese sal gebruik om tot seën vir ander te kan wees.
Margate leef vir Christus!

Soli Deo Gloria.
Kerkraad van N.G. Margate .— Opgestel deur Ds Lerisa Meyer.

15