Page 27 - flipbook Korrels 1-2025 Somer uitgawe

DIE EINDE, MAAR NUWE BEGIN
As gelowiges volg ons lewensverhale ‘n kronkelpad en draai soms
heeltemal anders uit as wat ons verwag het. Soms begin ons op ʼn
bekende pad, maar soms is die bestemming onbekend. Ek dink ook
oor my lewensreis aan die universiteit. My studies is voltooi en my
lewenspad skiet skielik ʼn ander koers in. Ek is beide dankbaar en
onseker, oorweldig en vervuld, maar meeste van alles geanker in die
Here met vrede in my hart.

Weet jy hoe jou pad gaan uitdraai of ervaar jy vrees oor die pad wat
jy stap? 1 Korintiërs 13:12 sê: “Nou sien ons deur ʼn spieël in ʼn
raaisel, maar eendag van aangesig tot aangesig. Nou ken ek ten
dele, maar eendag sal ek ten volle ken, net soos ek (deur God) ten
volle geken is.” Ons lewenspaaie maak soms eers later sin maar God
vra ons net om sy hand te vat en saam te stap.
Vandag is ʼn oomblik waar ek terugkyk na die afgelope sewe jaar
van studie en is dankbaar vir die hartseer, die vreugde, die
voorspelbare en onvoorspelbare paaie met die wete dat ek presies is
waar ek moet wees. Die terugblik laat my nie in die verlede stilstaan
nie, maar gee my moed om selfversekerd die volgende lewens-
hoofstuk aan te pak met my hand in die Here se hand. Vir ʼn oomblik
staan ek eers stil en stap dan vorentoe. Saam steek ons die wenpaal
oor en die afgelope reis kom tot ʼn einde.
Hills and Horizons sing: “Everything feels so different now, maybe I
wasn’t meant to understand all the hills and horizons I’ve seen over
and over again. We don’t get to see the whole picture (or) see the
whole thing, (only) a glimpse of the moment, promise, future, not the
in-between … I know I need to let go so I will hold on to you.”
Dalk is jy vandag aan die einde van ʼn lang pad of begin van ʼn nuwe
pad. Maak nie saak hoe onseker jy is nie, sit jou hand in die Here sʼn
en jy sal met ʼn huppel in jou stap die wedloop voltooi. Onthou vir elke
einde is daar ʼn nuwe begin wat vir jou wag. Skep nuwe moed, vertrou
die Here, voltooi die wedloop in afwagting van wat Hy in jou lewe
gaan doen as jy Hom met alles in jou vertrou.
Liefde,
Chrizaan

27