Page 32 - flipbook Korrels 1-2025 Somer uitgawe

DIE GOEIE STRYD

1 Timoteus 6:12-16

Dit het in hierdie brief telkens om stryd gegaan. Daar was allerlei
wysneuse in die gemeente doenig. Moeilikheidsoekers en moeilik-
heidmakers. Hulle het die Christelike geloof gesien as ʼn winsgewen-
de bedryf. Van dié mense moes Timoteus hom weerhou. Maar dit
beteken nie dat alle stryd daarmee uit die weg geruim was nie. Daar
bly nog steeds “die goeie stryd” om te stry. Daar bly nog die stryd om
regverdigheid, geloof, liefde, volharding, en sagmoedigheid. Paulus
herinner die jong man daaraan dat hy positief gekies het om hierdie
stryd te stry toe hy voor die gemeente gesê het dat hy ʼn Christen is.
Daar is ʼn groot verskil tussen die soort stryd wat in die gemeente
aan die gang was en die stryd waarvan Paulus hier praat. In die
gemeentlike stryd gaan dit om beterweterigheid. Hier gaan dit om ʼn
stryd om sagmoedigheid. Daar gaan dit om liefdeloosheid, maar hier
om die liefde self. Daar gaan dit om ʼn stryd ter wille van die aansien.
Hier gaan dit om ʼn stryd teen die aansien. Terwyl die twissoekers in
die gemeente hulleself en hulle eie wins nagestreef het, het hierdie
stryd God en die wins van vergenoegdheid in gedagte.
Kortom, die stryd waarom dit hier gaan, is die stryd teen jouself. Jy
stry nie teen iemand anders nie, maar teen jouself. En as jy dié stryd
nie positief stry nie, sal daar geen plek wees vir die regverdigheid en
die geloof en die liefde en die volharding en die sagmoedigheid nie.
Tussen jou en daardie Christelike kwaliteite staan alleen jyself en dis
jy self wat oorwin moet word. Hierdie stryd teen jouself is die goeie
stryd waarvan Paulus praat. ʼn Goeie stryd wat perspektiewe na die
toekoms open (6:14-16).
Ferdinand Deist - Met God vandag
17 September
Lux Verbi:BM

32