Page 34 - flipbook Korrels 1-2025 Somer uitgawe

GROEI DEUR DIE WAARHEID

Nee, ons sal in liefde by die waarheid bly en so in alle opsigte
groei na Christus toe ... (Ef. 4:15)
Dit is ʼn heerlike en onoortreflike waarheid dat geloof in Jesus Christus
jou van die sonde verlos. Dit is die uitgangspunt van die evangelie.
Maar ons durf nooit vergeet nie dat, nadat jy Christus as persoonlike
Verlosser en Saligmaker aangeneem het, die groeiproses in jou lewe
moet begin.

Indien jy die noodsaaklikheid van groei geringskat sal dit nie lank
duur voordat jou geestelike ervaring skipbreuk ly op die stormsee van
teleurstelling en wanhoop nie. Daar moet groei en ontwikkeling wees,
anders sal jou geestelike lewe kwyn en sterf.
Daar is soveel hulpmiddels wat God tot ons beskikking gestel het vir
ons geestelike groei. Maar ons moet oppas dat die hulpmiddels nie
doel op sigself word nie. Gemeenskap met gelowiges is noodsaaklik,
maar gemeenskap wat nie in Christus gesentreer is nie, dien geen
konstruktiewe doel nie.

ʼn Studie van die Bybel sal ʼn bron van gedurige inspirasie en leiding
wees, maar die doel moet altyd wees om die dissipel na Christus
heen te wys en Hom te verheerlik. Goeie werke en barmhartigheids-
diens aan minderbevoorregtes is ongetwyfeld vir God welbehaaglik,
maar hulle is slegs die vrugte van ons kennis van Jesus Christus en
kan nooit die plek inneem van ons geloof in Hom nie.

Daar kan alleen geestelike groei wees as dit jou hoofdoel is om
meer en meer die beeld van Christus te vertoon. Dit behoort die
hartsbegeerte van elke Christendissipel te wees. So word jou gees-
telike lewe meer as emosie en eis dit van jou, jou allerbeste vir sy
Allerhoogste – die lewe wat Hy vir jou verlossing afgelê het.

My Here en Verlosser, laat u Heilige Gees
só van my besit neem, dat ek alleen maar
tot U verheerliking sal lewe.

Solly Ozrovech - In die stilte van die môre
CUM

34