Page 31 - Korrels Winter uitgawe 3-2025

DESTYDS EN VANDAG

Lees Hebreërs 3:7-19

Maar solank daar nog ʼn “vandag” is, moet
Julle mekaar elke dag aanspoor (v 13)

Die skrywer haal die Psalmboek aan uit een van daardie liedere wat
na die woestyntrekkers se skynbaar nimmereindigende beswaardheid
verwys.
Psalm 95 is ʼn aanbiddingslied, maar dit kom met ʼn waarskuwing:
Moenie hardkoppig wees soos destyds nie; moenie jul voorvaders se
bedenklike voorbeeld volg nie.
Die Hebreërskrywer diep dié waarskuwing op en maak dit net so
van toepassing op ʼn nuwe geslag Jode, die wat aan Christus deel
gekry het. Die skrywer sê “destyds” is gelukkig verlede tyd; wat saak
maak, is vandag.
Nee, julle is regtig nie die gevangenes van jul verlede nie; julle leef
in ʼn nuwe werklikheid. Maak nou die beste gebruik daarvan.
Gelukkig het julle ook mekaar. Julle het susters en broers wat julle
aan destyds kan herinner en wat julle vandag kan aanspoor.
Volharding is oneindig moeilik sonder die wat jou geskiedenis deel en
saam met jou na ʼn blinknuwe toekoms uitsien.
Onthou egter ook dat daar mense is, jul eie mense, wat ontevrede
is, bitter, onvergenoegd en wat julle op daardie paadjie wil saam-
sleep.
En onthou Jesus, wat julle vrygemaak het van destyds se kettings.
Hy, onse Here, wat vandag ʼn nuwe begin maak. ʼn Volgende
hoopgewende skof op ons reis na die beloofde land.

Dankie, Here, dat die Woord en prediking, U goedheid
en U mense se gasvryheid my gereeld daaraan herinner dat die
Heiland vir my gebore is. Dankie vir die vreugde van elke dag, van
die helder boodskap van u liefde, vir die warmte van u omarming. En
die hoop op ʼn mooi toekoms.
Amen.
Barend Vos
100 Jaar Uit die Beek 2025
Lux Verbi

31